دہشت گردی کے بعد عرب دنیا کی جانب سے ہمدردی کرنے پر شکر گذار ہیں، فرانس

اسلام ٹائمز۔ پیرس میں اپنے خطاب کے دوران فرانس کے صدر فرانسوا اولاند نے اپنے ملک میں اسلام سمیت تمام مذاہب کو محفوظ قرار دیتے ہوئے کہا ہے کہ مسلمان خود سب سے زیادہ شدت پسندی سے متاثر ہوئے ہیں۔ پیرس میں عرب ورلڈ انسٹیٹیوٹ سے خطاب کے دوران فرانسیسی صدر نے پیرس میں دہشت گردی کے بعد عرب دنیا کی جانب سے ہمدردی کرنے پر ان کا شکریہ ادا کیا اور کہا کہ اسلام جمہوریت سے ہم آہنگ مذہب ہے اور فرانس یہ جانتا ہے۔ واضح رہے کہ گزشتہ ہفتہ پیرس میں ایک رسالے چارلی ہیبڈو اور یہودی سپر اسٹور پر حملے میں 17 افراد ہلاک ہوگئے تھے جس کے بعد فرانس بھر میں ان افراد کی یاد میں تقاریب کا سلسلہ جاری ہے۔ اس واقعے کے بعد فرانس میں کئی مساجد پر ایک درجن سے زائد بم حملے کئے گئے ہیں۔ فرانسوا اولاند کا کہنا تھا کہ ان کا ملک مسلمانوں اور ان کے مذہب کی عزت کرتا ہے، لیکن کسی بھی صورت میں اپنی آزادی اور جمہوریت پر سمجھوتہ نہیں کیا جائے گا۔ انھوں نے مزید کہا ہے کہ فرانس کے مسلمانوں کے بھی وہی حقوق اور فرائض ہیں، جو دیگر فرانس کے شہریوں کے ہیں۔ فرانس کے صدر نے خطاب کے دوران کہا کہ مسلمانوں کو بھی اسی طرح کی حفاظت اور احترام ملنا چاہیئے، جیسا کہ وہ ملک کو دیتے ہیں۔ انھوں نے کہا کہ فرانس عرب اور یورپ کے تعلقات کو مضبوط بنانے کیلئے نئے تجاویز پیش کرے گا، جس کے ذریعے مزید عرب ممالک کے طلبہ کو فرانس میں پڑھنے کی اجازت بھی شامل ہو گی۔