اسلام ٹائمز۔ صوبائی دارالحکومت لاہور میں پولیس نے ایک جعلی ڈی ایس پی کو گرفتار کرلیا ہے۔ پولیس کو اطلاع ملی کہ ڈی ایس پی کی وردی میں مشکوک شخص علاقہ غازی آباد میں موجود ہے۔ پولیس نے مختلف مقامات پر ناکہ بندی کرکے مذکورہ شخص کو روک لیا۔ تحقیقات کرنے پر معلوم ہوا کہ مذکورہ شخص کا پولیس سے دور دور تک کوئی واسطہ نہیں۔ پولیس نے جعلی ڈی ایس پی کو گرفتار کرکے تفتیش کی غرض سے نامعلوم مقام پر منتقل کردیا ہے۔ علاقہ مکینوں کے مطابق مذکورہ شخص کئ دنوں سے علاقے میں اسی طرح وردی پہن کر گشت کر رہا تھا۔