اسلام ٹائمز۔ سانحہ صفورا پر گزشتہ روز ایپکس کمیٹی کے اجلاس میں ہونے والے فیصلوں کے بعد کراچی آپریشن میں بلا کی تیزی آگئی ہے، شہر کے مخلتف مقامات پر رینجرز اور پولیس کے چھاپوں کے دوران تقریبا 200 ملزمان کو حراست میں لیا گیا۔ تفصیلات کے مطابق قانون نافذ کرنیوالے اداروں نے رات گئے کورنگی سے لے کر اورنگی ٹاؤن تک کارروائیاں کیں، چھاپوں کے دوران مختلف مقامات سے حراست میں لئے جانے والوں ایم کیو ایم کا یونٹ انچارج، غیر ملکی، کالعدم تنظیم کے دہشتگرد اور خطرناک ٹارگٹ کلر عالم زیب عرف عابد گنجا بھی شامل ہے۔ حراست میں لئے گئے ملزمان سے بھاری مقدار میں اسلحہ بھی برآمد کیا گیا۔ نیو کراچی خمیسو گوٹھ میں گھر گھر تلاشی کے دوران پولیس نے ٹارگٹ کلر سمیت 56 افراد کو دھر لیا، پولیس کے مطابق گرفتار ٹارگٹ کلر عالم زیب عرف گنجا نے 19 افراد کے قتل کا اعتراف کرلیا ہے۔
گلشن اقبال کی مدینہ کالونی سے 18، کورنگی زمان ٹاؤن سے 35، گلستان جوہر سے 5 اور عیسیٰ نگری قبرستان کے اطراف سے 24 مشتبہ افراد کو حراست میں لے لیا گیا۔ اس سے قبل رینجرز نے لیاقت آباد سندھی ہوٹل کے قریب گلیوں کا محاصرہ کرکے گھر گھر تلاشی لی، کارروائی کے دوران ایم کیو ایم کے یونٹ انچارج اور جوائنٹ یونٹ انچارج سمیت 22 کارکنان کو گرفتار کرکے تفتیش کیلئے نامعلوم مقام پر منتقل کر دیا، جبکہ ایم کیو ایم کی رابطہ کمیٹی نے کسی یونٹ انچارج یا کارکن کی گرفتاری کی تردید کی ہے۔ فرنٹئیر کالونی، جہانگیر روڈ اور پٹیل پاڑہ میں چھاپوں کے دوران 4 غیر ملکیوں سمیت درجنوں افراد کو گرفتار کر لیا گیا، کئی ملزمان سے اسلحہ بھی برآمد کیا گیا۔ اس کے علاوہ شہر کے دیگر مقامات پر بھی رینجرز اور پولیس نے چھاپے مار کر درجنوں افراد کو گرفتار کیا۔