اسلام ٹائمز - وفاقی دارالحکومت، راولپںڈی، تلہ گنگ، میانوالی، ڈی آئی خان سمیت کئی شہروں میں بارش

وفاقی دارالحکومت، راولپںڈی، تلہ گنگ، میانوالی، ڈی آئی خان سمیت کئی شہروں میں بارش

اسلام ٹائمز: اسلام آباد، لاہور سمیت پنجاب اور خیبرپختونخوا کے اکثر علاقوں میں پری مون سون کا آغاز ہو گیا ہے، بارش اور تیز ہواؤں سے گرمی کا زور ٹوٹ گیا اور شہریوں نے بھی سکھ کا سانس لیا ہے، محکمہ موسمیات نے جمعرات تک مزید بارشوں کی خوشخبری دی ہے۔

اسلام ٹائمز۔ روزہ داروں کی دعائیں آخر کار رنگ لائیں، اور موسم کے تیور ہی بدل گئے۔ دن بھر شدید گرمی کے بعد کہیں تیز ہوائیں کہیں مٹی کا طوفان کہیں رم جھم اور کہیں کھل کر برکھا برسنے سے ہر منظر نکھر گیا۔ شہر اقتدار اور جڑواں شہر راولپنڈی میں ہونے والی بوندا باندی سے موسم خوشگوار ہو گیا۔ گرمی سے نڈھال شہری بھی جھوم اٹھے۔ لاہور میں رات کو آندھی کے بعد کئی علاقوں میں بادل برسے۔ جس سے موسم بھی سہانا ہو گیا۔ اس سے پہلے دن بھر چلنے والی ہواؤں نے پارہ گرائے رکھا۔ شیخو پورہ، مرید کے، قصور، گجرات، گوجرانوالہ، جہلم، فیصل آباد، لیہ، ساہیوال، ڈی آئی خان سمیت کئی شہروں میں موسلادھار بارش ہوئی۔ ملتان اور گردو نواح میں تیز آندھی چلی، جبکہ لاڑکانہ میں مٹی کا طوفان آیا۔ محکمہ موسمیات کا کہنا ہے کہ پری مون سون بارشوں کا سلسلہ جمعرات تک جاری رہنے کا امکان ہے۔ اس دوران اسلام آباد، راولپنڈی، لاہور، گوجرانوالہ، فیصل آباد، سرگودھا، ملتان، پشاور، ڈی آئی خان، ہزارہ ڈویژن، کشمیر، ژوب، سبی میں بادل برس سکتے ہیں۔