مسلمانان پاکستان فلسطینیوں کی سیاسی و اخلاقی حمایت میں بڑھ چڑھ کر حصہ لیں، فلسطین فاؤنڈیشن پاکستان

اسلام ٹائمز۔ فلسطین فاؤنڈیشن پاکستان کے مرکزی سر پرست رہنماؤں سابق رکن قومی اسمبلی و رہنما جماعت اسلامی مظفر احمد ہاشمی، جمعیت علماء پاکستان کے مرکزی رہنما علامہ قاضی احمد نورانی صدیقی، پاکستان مسلم لیگ ن کے رہنما اظہر علی ہمدانی، مجلس وحدت مسلمین کے رہنما مولانا باقر زیدی، متحدہ قومی موومنٹ کے رہنما محفوظ یار خان ایڈووکیٹ اور فلسطین فاؤنڈیشن پاکستان کے مرکزی سیکرٹری جنرل صابر کربلائی نے کہا ہے کہ مسئلہ فلسطین عالم اسلام کے مسائل میں سب سے اہم ترین مسئلہ ہے اور فلسطین کا المیہ ایک انسانی المیہ ہے، تاہم ایک مسلمان ہونے کی حیثیت سے ہماری ذمہ داری بنتی ہے کہ انسانیت کے سلگتے ہوئے اس اہم مسئلہ کے حل میں اپنا کردار ادا کریں۔ انہوں نے کہا کہ رمضان المبارک کی آمد کے ساتھ جہاں دنیا بھر کے مسلمان عبادات میں مصروف عمل ہیں وہاں ضرورت اس امر کی ہے کہ دنیا میں مظلوم بنا دی جانے والی ملت فلسطین کے حقوق کے لئے بھی پہلے سے زیادہ شد و مد کے ساتھ آواز بلند کی جائے۔ انہوں نے پاکستان کے عوام سے اپیل کی کہ رمضان المبارک کے مہینہ میں فلسطینیوں سے اظہار یکجہتی کے لئے ہونے والے تمام پروگراموں کو کامیاب بنانے کے لئے اور فلسطینیوں کی سیاسی و اخلاقی حمایت جاری کرنے میں عوام بڑھ چڑھ کر حصہ لیں۔ ان خیالات کا اظہار فلسطین فاؤنڈیشن کے رہنماؤں نے ادارہ نورحق میں فلسطین فاؤنڈیشن کے مرکزی سرپرست کمیٹی کے اجلاس میں گفتگو کرتے ہوئے کیا۔ اجلاس میں ماہ رمضان المبارک میں فلسطینی عوام سے ہمدردی اور یوم القدس کی مناسبت سے پروگراموں کو بھی حتمی شکل دی گئی۔

فلسطین فاؤنڈیشن پاکستان کے رہنماؤں کا کہنا تھا کہ آج دنیائے اسلام کی تمام تر مشکلات کے پیچھے واضح طور پر امریکی اور اسرائیل ہاتھ کار فرما ہے جو نہ صرف مسلم امہ کو تقسیم بلکہ مسلم دنیا کے تمام تر وسائل پر غاصبانہ تسلط قائم کرکے عالم اسلام کو اپنا غلام بنانے کی ناپاک سازشوں میں مصروف عمل ہے۔ انہوں نے کہا کہ دنیا میں اسلام کے سوا کوئی ایسا مذہب موجود نہیں جو انسانیت کو نجات بخشنے والا ہو تاہم فلسطین کا انسانی المیہ اور اس کے حل میں اسلامی جدوجہد اور اسلامی مزاحمت کے راستے میں ہے، تاہم کچھ ناعاقبت اندیش اور امریکی کاسہ لیس حکمران چاہتے ہیں کہ فلسطینیوں کے حقوق پر سودے بازی کی جائے تاہم پاکستان کے عوام اس حوالے سے ہوشیار رہیں اور کسی بھی ناپاک سازش و عزائم کو کامیاب ہونے کی راہ میں رکاوٹ بن جائیں۔