اسلام ٹائمز۔ وزیراعلٰی سندھ سید قائم علی شاہ نے کہا ہے کہ کراچی میں فول پروف انتطامات کے باعث یوم حضرت علیؑ پر کوئی ناخوشگوار واقعہ پیش نہیں آیا، ہم نے کراچی میں امن و امان برقرار رکھنے کا تہیہ کر رکھا ہے۔ تفصیلات کے مطابق وزیراعلٰی سندھ سید قائم علی شاہ نے کہا کہ پولیس اور رینجرز جان ہتھیلی پر رکھ کر عوام کو تحفظ دے رہے ہیں، قوم دہشتگردی، ٹارگٹ کلنگ، بھتہ خوری کے خلاف متحد اور سکیورٹی اداروں کے شانہ بشانہ ہے، جبکہ کراچی میں فول پروف انتطامات کے باعث یوم حضرت علیؑ پر کوئی ناخوشگوار واقعہ پیش نہیں آیا۔ وزیراعلٰی سندھ کا کہنا تھا کہ ہم نے کراچی میں امن و امان برقرار رکھنے کا تہیہ کر رکھا ہے، اور اس کیلئے پولیس کو ہر حوالے سے مضبوط اور مستحکم کر رہے ہیں، جبکہ پولیس کی استعداد کار میں اضافے کیلئے جدید اسلحہ دیا جا رہا ہے۔