انکوائری کمیشن نے ہمیں سرخرو کیا، الزام لگانے والے جھوٹے ثابت ہوئے، افتخار چودھری

اسلام ٹائمز۔ سابق چیف جسٹس آف پاکستان افتخار محمد چوہدری نے جوڈیشل کیمشن کے فیصلے کو اہم سنگ میل قرارد یتے ہوئے کہا کہ اللہ تعالیٰ نے جوڈیشل کیمشن اور آر اوز کو سرخرو کر دیا۔ پاکستان ورکرز کنفیڈریشن بلوچستان کے کارکنوں نے افتخار چوہدری افتخار کا پرتپاک استقبال کیا، اس موقع پر میڈیا کے نمائندوں سے گفتگو کرتے ہوئے انہوں نے پاکستان تحریک انصاف کی جانب سے جنرل الیکشن 2013ء میں دھاندلی کے الزامات پر جوڈیشل کمیشن کے فیصلے کو خوش آیند قرار دیا۔ افتخار چوہدری نے خورشید لیبر ہال کوئٹہ میں میڈیا سے بات کرتے ہوئے کہا کہ جن لوگوں نے دھاندلی کا الزام لگایا وہ جھوٹے نکلے جبکہ جوڈیشل کمیشن اور تمام اراوز کو اللہ تعالی نے سرخرو کر دیا۔ اس موقع پر سابق چیف جسٹس نے کسی سیاسی جماعت میں شمولیت کے بجائے اپنی سیاسی جماعت بنانے اور مزدورں، محنت کشوں اور ہاریوں کیلئے آواز بلند کرنے کا اعلان کیا۔ افتخار چوہدری کا کہنا تھا کہ میرا کسی جماعت میں جانے کا ارادہ نہیں بلکہ میں بہت جلد اپنی سیاسی جماعت بنانے کا اعلان کروں گا۔ سابق چیف جسٹس نے حکومت، سیاسی جماعتوں اور الیکشن کیمشن کو تجویز دی ہے کہ وہ انتخابی عمل میں اصلاحات لائیں تاکہ آئندہ کوئی الزام نہ لگے۔ اس موقع پر افتخار چوہدری کے ساتھ ان کے صاحبزادے ارسلان افتخار بھی موجود تھے۔