پی ٹی آئی کے چیئرمین مخالفین پر بے جا تنقید کی عادت پر قابو پائیں ، ملک آصف بھا

اسلام ٹائمز۔ پنجاب کے صوبائی وزیر جنگلات ملک محمد آصف بھا نے کہا ہے کہ انتخابی دھاندلیوں کے حوالے سے جوڈیشل کمیشن کا فیصلہ سچ کی جیت ہے، مسلم لیگ ن کی حکومت پنجاب سمیت ملک بھر میں عوام کی تقدیر بدلنے کے لئے کام کر رہی ہے۔ مسلم لیگ ہاؤس جوہرآباد میں صحافیوں سے بات کرتے ہوئے انہوں نے کہا کہ پی ٹی آئی کے چیئرمین مخالفین پر بے جا تنقید کی عادت پر قابو پائیں، بلدیاتی انتخابات مقررہ وقت پر ہونگے، مسلم لیگ کے امیدواروں کو میرٹ پر ٹکٹ جاری کئے جائینگے۔ صوبائی وزیر کا کہنا تھا کہ صوبہ پنجاب میں سیلاب متاثرین کو ریلیف فراہم کرنے کے لئے ہنگامی بنیادوں پر اقدامات کئے جا رہے ہیں۔