سندھ میں رینجرز کے مشروط اختیارات میں 60 روز کی توسیع

اسلام ٹائمز۔ سندھ حکومت نے صوبے میں رینجرز کے اختیارات میں 60 روز کی توسیع کر دی ہے، جس کا اطلاق 6 دسمبر سے ہوگیا ہے۔ تفصیلات کے مطابق وزیراعلیٰ سندھ سید قائم علی شاہ نے رینجرز کے اختیارات میں توسیع کی سمری پر دستخط کر دیئے ہیں، جس کے تحت رینجرز کو حاصل اختیارات میں 60 روز کی توسیع کی گئی ہے، جس کا اطلاق 6 دسمبر 2015ء سے ہوگا، اور رینجرز کو دہشتگردی، فرقہ وارانہ قتل، ٹارگٹ کلنگ، بھتہ خوری اور اغواء برائے تاوان کے ملزمان کے خلاف کارروائی کیلئے خصوصی اختیارات حاصل ہوں گے۔ واضح رہے کہ سندھ اسمبلی میں منظور کی گئی قرارداد کے تحت اب رینجرز کو سرکاری دفاتر میں چھاپے اور سرکاری افسران سے پوچھ گچھ کا اختیار نہیں ہوگا، رینجرز کو یہ اقدام کرنے سے قبل وزیراعلیٰ سندھ سے اجازت لینا ہوگی۔