2016 تبدیلی کا سال ہو گا، عوام تیار رہیں، دھاندلی کرنے والوں کو نہیں چھوڑیں گے، عمران خان

اسلام ٹائمز۔ پاکستان تحریک انصاف کے چیئرمین عمران خان نے کہا ہے کہ لودھراں کی عوام دھونس اور دھاندلی کی سیاست کو مسترد کر دیں گے، لودھراں زندہ لوگوں کا شہر ہے اور صدیق خان آپ کے حقوق کا صحیح ترجمان ہے۔ ان خیالات کا اظہار اُنہوں نے لودھراں میں ضمنی انتخاب کے سلسلے میں پی ٹی آئی کے رہنما جہانگیر ترین کے جلسے سے خطاب کرتے ہوئے کیا۔ عمران خان کا مزید کہنا تھا کہ 2016 کا سال پورے ملک کے لیے تبدیلی کا سال ہے، پاکستان میں کسی کو دھونس اور دھاندلی نہیں کرنے دیں گے۔ عمران خان نے کہا 2013 میں اتنا جنون نہیں دیکھا تھا جو آج لودھراں میں نظر آ رہا ہے۔ جہانگیر ترین کی وجہ سے نواز شریف نے لودھراں میں ڈھائی ارب کا پیکج دیا کیونکہ انہیں ڈر ہے جہانگیر ترین جیت نہ جائے۔ لودھراں کے لوگ پٹواریوں کی رشوت سے تنگ آ گئے ہیں۔ اب لوگ تبدیلی دیکھنا چاہتے ہیں اور یہاں کے لوگ باشعور ہیں کسی پیکج پر بکنے والے نہیں۔

عمران خان اپنے خطاب کے دوران پنجاب حکومت پر بھی خوب برسے کہتے ہیں میٹرو بس، اورنج لائن کا پیسہ اسکولوں پر خرچ ہونا چاہیے تھا کیونکہ اورنج لائن منصوبے پر لگنے والے پیسے سے 25 ہزار اسکول بن سکتے تھے۔ ان کا مزید کہنا تھا قرضے لیکر مہنگے پراجیکٹ بنائے جا رہے ہیں۔ پہلے انسانوں پر پیسہ خرچ کیا جانا چاہیے تھا اور اگر یہی پیسہ ہسپتالوں پر خرچ کیا جاتا تو مفت ادویات ملتیں۔ عمران خان نے کہا بھارت کے کسان کی حکومت مدد کرتی ہے لیکن پاکستان میں کسان کا معاشی قتل کیا جا رہا ہے۔ ظالم نظام سے تنگ قوم اب نیا پاکستان چاہتی ہے۔ خیبرپختونخوا میں کسی کیخلاف انتقامی کارروائی نہیں ہوتی لیکن پنجاب کے اندر ہمارے 11 کارکنوں کو گولی ماری گئیں کوئی نہیں پکڑا گیا۔ عمران خان نے شہباز شریف کو تنقید کا نشانہ بناتے ہوئے کہا 22 جماعتوں نے 2013 کے الیکشن میں دھاندلی کا کہا اور شہباز شریف کہتے ہیں دھاندلی کو بھول جائوں۔ مجھے پتا ہے آپ دھاندلی کے بغیر جیت ہی نہیں سکتے۔ کہتے ہیں دھاندلی بڑا جرم ہے اسے کبھی نہیں بھولوں گا اور دھاندلی میں ملوث افراد کو سزائیں ملنے تک چپ نہیں بیٹھوں گا۔