QR Code

آئینی حیثیت کے تعین میں بلتستان کیساتھ نااںصافی ہوئی تو برداشت نہیں کریں گے، فدا ناشاد

10 Jan 2016 23:11

اسلام ٹائمز: مسلم لیگ نون کے رہنماء نے اپنے ایک بیان میں کہا ہے کہ بلتستان کے عوام میں پائے جانے والی تشویش کو دورکرنے کے لئے ضروری ہے کہ وزیراعلٰی فوری طور پر صورت حال کی وضاحت کریں۔

اسلام ٹائمز۔ قانون ساز اسمبلی گلگت بلتستان کے سپیکر حاجی فدا محمد ناشاد نے کہا ہے کہ جماعت اسلامی گلگت بلتستان کے امیر کے اس بیان سے بلتستان کے عوام میں غم و غصہ اور تشویش کی لہر دوڑ گئی ہے جس میں انہوں نے کہا تھا کہ مسلم لیگ (ن) کی حکومت نے گلگت اور دیامر کے عوام کو آئینی حقوق دینے اور بلتستان کے عوام کوقومی اسمبلی میں مبصر کی حیثیت دے کر ٹرخانہ چاہتی ہے۔ انہوں نے کہا کہ ہمیں یقین ہے کہ بلتستان کے عوام کے ساتھ اس قسم کا امتیازی سلوک کبھی نہیں کیا جائے گا۔ حاجی فدا محمد ناشاد نے کہا کہ جماعت اسلامی کے امیر کے بیان کے بعد بڑی تعداد میں لوگ ہم سے رابطہ کررہے ہیں۔ بلتستان کے عوام میں پائے جانے والی تشویش کو دورکرنے کے لئے ضروری ہے کہ وزیراعلٰی فوری طور پر صورت حال کی وضاحت کریں۔ سپیکر جی بی اسمبلی نے کہا ہے کہ میں نے وزیراعلٰی کو پیغام پہنچادیا ہے کہ وہ جماعت اسلامی کے امیر کے بیان سے پیدا ہونے والی صورت حال کا نوٹس لے اور بلتستان کے عوام کو مطمئن کرنے کے لئے صورتحال کی وضاحت کرے۔ انہوں نے کہا کہ گلگت بلتستان کے عوام گزشتہ 68 سال سے اپنے آئینی حقوق سے محروم چلے آرہے ہیں۔ ہمیں امید ہے کہ وزیراعظم نوازشریف گلگت بلتستان کے عوام کے مسائل حل کریںگے اور آئینی حیثیت کا تعین کرتے ہوئے بلتستان کے ساتھ امتیازی سلوک روا رکھا گیا تو ہم اسے برداشت نہیں کریںگے۔

خبر کا کوڈ: 511580