QR Code

لاہور واقعہ کی ذمہ دار پنجاب حکومت کا نااہل حکمران ہے جس کے نزدیک پنجاب میں طالبان کا کوئی وجود نہیں، عقیل حسین خان

28 Mar 2016 11:56

اسلام ٹائمز: مشہد مقدس سے جاری بیان کے مطابق ایم ڈبلیو ایم کے سیکرٹری جنرل کا کہنا تھا کہ ملک بھر میں جتنے بھی دہشت گردی کے واقعات ہو رہے ہیں انکے پیچھے سعودی تکفیری سوچ کے مدارس ہیں۔

اسلام ٹائمز۔ مجلس وحدت مسلمین شعبہ مشہد مقدس کے سیکرٹری جنرل حجتہ الاسلام عقیل حسین خان نے لاہور میں ستر سے زیادہ بے گناہ افراد کی شہادت پر دکھ کا اظہار کرتے ہوئے کہا کہ اس سانحے کی جتنی بھی مذمت کی جائے کم ہے۔ آج پوری ملت سوگوار ہے۔ دل خون کے آنسو رو رہا ہے۔ اس واقعے کا ذمہ دار پنجاب حکومت کا نااہل حکمران ہے جس کے نزدیک پنجاب میں طالبان کا کوئی وجود نہیں۔ سیکرٹری جنرل شعبہ مشہد مقدس نے کہا کہ لاکھوں افراد ملک بھر میں دہشت گردی کی بھینٹ چڑھ گئے پر ابھی تک ہمارے حکمرانوں کو معلوم نہ ہو سکا کہ اس کے پیچھے کون ہے جبکہ آج سب پر واضح ہو چکا ہے کہ سعودی وہابی تکفیری سوچ نے ہی پوری دنیا کے امن کو خطرے میں ڈالا ہوا ہے۔ عقیل حسین خان نے کہا ملک بھر میں جتنے بھی دہشت گردی کے واقعات ہو رہے ہیں انکے پیچھے سعودی تکفیری سوچ کے مدارس ہیں اور جب تک ان کے اور ان کے سر پرستوں کے خلاف کاروائی عمل میں نہیں لائی جاتی مادر وطن میں امن و امان ممکن نہیں۔ ان تکفیری عناصر کے سرپرست اسلام آباد میں اور رانا ثنااللہ کی صورت میں خود حکومت کے اندر موجود ہیں اس لئے اس حکومت سے کسی خیر کی توقع رکھنا ہی فضول ہے۔ اور اب پوری پاکستانی قوم کی امیدیں پاکستان آرمی پر لگی ہوئی ہیں۔

خبر کا کوڈ: 530047