پاک چین اقتصادی راہداری منصوبے پر تحفظات، بھارت

اسلام ٹائمز۔ بھارتی حکومت نے ایک بار پھر پاک چین اقتصادی راہداری منصوبے پر تحفظات کا اظہار کرتے ہوئے کہا کہ چین پاکستانی زیر انتظام کشمیر میں اپنی سرگرمیاں بند کرے، ہم نے پاکستانی زیر انتظام کشمیر میں چینی سرگرمیوں کے معاملے پر اپنی تشویش سے بیجنگ حکام کو آگاہ کردیا۔ بھارت کی مرکزی وزیر مملکت برائے امورخارجہ وی کے سنگھ نے کہا کہ چین نام نہاد اقتصادی راہداری منصوبے کی تیاری میں پاکستان کی مدد کر رہا ہے اور اقتصادی راہداری منصوبے کے تحت اسکے کچھ منصوبے پاکستانی زیر انتظام کشمیر میں بھی ہیں، ہمیں اقتصادی راہداری پر تحفظات ہیں۔ وی کے سنگھ نے کہا کہ بھارتی حکومت نے پاکستانی زیر انتظام کشمیر میں چین کی سرگرمیوں کے معاملے پر اپنی تشویش سے بیجنگ سے اعلیٰ سطح پر رابطہ کر کے ان سرگرمیوں کو فوری بند کرنے کو کہا ہے۔