QR Code

قبلہ اول کی آزادی تک ہماری جدوجہد جاری رہے گی، علامہ عارف واحدی

9 Jun 2016 14:15

اسلام ٹائمز: مرکزی دفتر میں ہونے والے یوم القدس کمیٹی کے اجلاس کے دوران گفتگو کرتے ہوئے شیعہ علماء کونسل کے مرکزی سیکرٹری جنرل نے کہا ہے کہ قیادت کی ہدایت پر یوم القدس کے موقع پہ اسرائیلی جارحیت کیخلاف ریلیاں نکالی جائیں گی، اقوام متحدہ او آئی سی اپنی ذمہ داریاں ادا کریں اور اسرائیلی جارحیت رکوانے میں اپنا کردار ادا کریں۔

اسلام ٹائمز۔ شیعہ علماء کونسل پاکستان کے مرکزی سیکرٹری جنرل علامہ عارف حسین واحدی نے کہا ہے کہ علامہ سید ساجد علی نقوی کی ہدایت پر وفاقی دارالحکومت، چاروں صوبوں، کشمیر، گلگت بلتستان سمیت ملک بھر کے تمام شہروں، قصبوں، دیہاتوں اور ٹاؤنز میں جمعۃ الوداع کے موقع پر یوم القدس کی ریلیاں، مظاہرے، سیمینارز اور مذاکروں کا انعقاد کیا جائیگا۔ علامہ عارف حسین واحدی کا کہنا تھا کہ اقوام متحدہ، او آئی سی اور مسلم ممالک اپنی ذمہ داریاں ادا کریں اور اسرائیلی جارحیت رکوانے میں اپنا مثبت کردار ادا کریں۔ اسلامی ممالک میں امن کے بغیر دنیا کو پرامن بنانے کا خواب شرمندہ تعبیر نہیں ہوسکتا، ہر مسلمان کی ذمہ داری بنتی ہے کہ وہ بلاتفریق یہودیوں سے قبلہ اول کو آزاد اور مظلوم فلسطینی بھائیوں پر مظالم رکوانے کیلئے ہر سطح پر آواز بلند کریں۔ علامہ عارف حسین واحدی نے یہ بات مرکزی آفس میں منعقدہ مرکزی یوم القدس کمیٹی کے اجلاس میں کی۔

یوم القدس کے سلسلے میں کئے گئے انتظامات پر اطمینان کا اظہار کرتے ہوئے ان کا مزید کہنا تھا کہ اجلاس میں تیاریوں کے تمام پہلوں کا باریک بینی سے جائزہ لیا گیا اور ملک کے تمام صوبائی، ڈویژن، ضلعی اور تحصیل و یونٹ سطح کے تمام عہدیداران کو بھی ہدایات جاری کر دی گئی ہیں۔ انہوں نے کہا کہ مرکزی یوم القدس کمیٹی تمام صوبوں اور اضلاع میں قدس کمیٹی کی کارکردگی کا جائزہ لے گی اور ملک بھر میں شہر شہر، نگر نگر پرامن یوم القدس ریلیوں میں عوامی شرکت کو مثالی اور کامیاب بنانے کے لئے تمام سطح پر رابطوں کا سلسلہ بڑھائے گی۔ اجلاس میں حکومتی ذمہ داران اور پولیس انتظامیہ سے بھی توقع کا اظہار کیا کہ وہ سابقہ روایات کو برقرار رکھتے ہوئے ریلیوں کو سکیورٹی سمیت دیگر انتظامی معاملات میں قدس کمیٹی کے ذمہ داران سے بھی تعاون کریں گے۔

خبر کا کوڈ: 544476