میجر علی جواد چنگیزی کی پشاور میں نماز جنازہ ادا کردی گئی، آرمی چیف کی بھی شرکت

اسلام ٹائمز۔ طورخم بارڈر پر افغان سیکیورٹی فورسز کی فائرنگ سے شہید ہونے والے میجر علی جواد چنگیزی کی پشاور میں نماز جنازہ ادا کردی گئی، جس میں پاک فوج کے سربراہ جنرل راحیل شریف نے بھی شرکت کی۔ اس موقع پر انہوں نے میجر علی جواد کے بچوں اور دیگر اہل خانہ سے ملاقات کرتے ہوئے شہید افسر کی قربانی کو خراج تحسین پیش کیا۔ میجر علی جواد چنگیزی افغان سیکیورٹی فورسز کی فائرنگ کے نتیجے میں زخمی ہوگئے تھے، انہیں شدید زخمی حالت میں پشاور منتقل کیا گیا تھا، جہاں دوران علاج وہ خالق حقیقی سے جاملے۔ میجر علی جواد کا تعلق کوئٹہ سے ہے اور انہیں ان کے آبائی علاقے میں ہی سپرد خاک کیا جائے گا۔ خیبرایجنسی میں افغانستان سے ملحقہ سرحدی علاقے طورخم میں دوسرے روز بھی شدید کشیدگی برقرار ہے۔ گزشتہ روز دن ڈھلتے ہی افغان فورسز کی جانب سے اشتعال انگیزی کا سلسلہ دوبارہ شروع ہوگیا تھا،جس پر پاک فوج نے بھی بھرپور انداز میں جواب دیا تھا۔ فائرنگ اور گولہ باری کا سلسلہ فی الحال رکا ہوا ہے، لیکن طورخم میں مسلسل دوسرے روز بھی کرفیو نافذ ہے تاہم مقامی انتظامیہ نے لنڈی کوتل میں 36 گھنٹوں بعد کرفیو اٹھا لیا ہے، جس کے بعد وہاں زندگی معمول پر آگئی ہے، لیکن سرحد سے لوگوں اور گاڑیوں کی آمدو رفت مکمل طور پر بند ہے۔ دوسری جانب الٹا چورکوتوال کو ڈانٹے کی مصداق افغان وزارت خارجہ نے طورخم بارڈر پر کشیدگی کی ذمہ داری پاکستان پرعائد کرتے ہوئے، پاک فوج کے جوانوں پر ہی افغان بارڈر پر فائرنگ کا الزام عائد کردیا ہے۔ وزارت خارجہ نے افغانستان میں تعینات پاکستانی سفیر سید ابرار حسین کو طلب کرتے ہوئے ان سے احتجاج کیا ہے۔ افغان وزارت خارجہ کا کہنا ہے کہ پاکستان نے گیٹ کی تعمیر کے معاملے پر معاہدے کی خلاف ورزی کی ہے۔ پاک فوج کے شعبہ تعلقات عامہ ’’آئی ایس پی آر‘‘ کے مطابق افغان فورسز نے طورخم گیٹ پر پاکستانی حدود میں بلا اشتعال فائرنگ کی تھی، طورخم پرزیر تعمیر گیٹ پاکستانی سرحدی حدود کے 37 میٹر اندر ہے، یہ گیٹ دہشت گردوں کی نقل حرکت روکنے کے لیے ضروری ہے۔ واضح رہے کہ 2 روزقبل افغانستان سے لوگوں کی آمد ورفت کو مانیٹرکرنے کے لیے پاکستان نے طورخم بارڈر پر اپنی سرحدی حدود میں گیٹ نصب کیا ہے، جس پرافغان فورسزنے 2 روز سے اشتعال انگیزی پھیلا رکھی ہے۔