اسلام ٹائمز۔ وزیر اطلاعات پرویز رشید کو الیکشن کمیشن ارکان کی تقرری سے متعلق پارلیمانی کمیٹی کا چیئرمین منتخب کرلیا گیا ہے۔ الیکشن کمیشن کے ارکان کی تقرری کے لیے بارہ رکنی پارلیمانی کمیٹی کا اجلاس پارلیمنٹ ہاوس میں ہوا جس میں حکومت کی جانب سے پارلیمانی کمیٹی کے چیئرمین کے لیے پرویز رشید کا نام تجویز کیا گیا۔ ارکان نے متفقہ طور پر پرویز رشید کو پارلیمانی کمیٹی کا چیئرمین منتخب کرلیا۔ اجلاس کے بعد میڈیا سے گفتگو کرتے ہوئے پرویز رشید نے کہا کہ یہ انتہائی اہم زمہ داری ہے، انتخابی عمل کو صاف شفاف بنانے کی پوری کوشش کریں گے، پرویز رشید نے کہا کہ اپوزیشن لیڈر اور لیڈر آف ہاوس میں ممبران کی تعیناتی پر تبادلہ خیال ہو گیا ہے، ایک دو روز میں سفارشات موصول ہو جایئں گی، فاسٹ ٹریک پر کام کریں گے، پرویز رشید نے کہا کہ شاہ محمود قریشی نے ان پر مکمل اعتماد کیا ہے، ان کے اعتماد پر پورا اترنے کی کوشش کریں گے۔