اسلام آباد:
اسلام ٹائمز-صدر آصف علی زرداری سے اتوار کو وزیراعظم یوسف رضا گیلانی نے ایوان صدر میں ملاقات کی۔ اس موقع پر دونوں رہنماؤں کے مابین ملک کی سیاسی و معاشی صورتحال، گرفتار امریکی اہلکار ریمنڈ ڈیوس کے معاملہ پر امریکی دباؤ، گول میز کانفرنس اور سابق وزیرخارجہ شاہ محمود قریشی کے قلمدان سے متعلق امور پر تفصیلی تبادلہ خیال کیا گیا۔ ذرائع کے مطابق ملاقات میں دونوں رہنماؤں نے سابق وزیر خارجہ شاہ محمود قریشی کے قلمدان کے حوالے سے بھی تبادلہ خیال کیا۔ صدر مملکت نے اس موقع پر زور دیا کہ نئی کابینہ کی تشکیل کے موقع پر بعض رہنماؤں کے تحفظات کو دور کرنے کیلئے اقدامات کئے جائیں۔ اس موقع پر وزیراعظم نے صدر کو اپنے مجوزہ دورہ کویت جبکہ صدر نے اپنے مجوزہ دورہ جاپان کے حوالے سے وزیراعظم کو اعتماد میں لیا۔ ذرائع کے مطابق ملاقات میں دونوں رہنماؤں کے مابین اس بات پر اتفاق ہوا کہ پاکستانی شہریوں کے قتل میں گرفتار امریکی اہلکار کے سفارتی استثنیٰ کا فیصلہ عدالت کریگی۔