0
Monday 20 Jun 2016 19:23

آئی جی سندھ کا کراچی میں اسٹریٹ کرائم کے بڑھتے واقعات کا نوٹس

آئی جی سندھ کا کراچی میں اسٹریٹ کرائم کے بڑھتے واقعات کا نوٹس
اسلام ٹائمز۔ آئی جی سندھ اے ڈی خواجہ نے رمضان المبارک میں بڑھتے ہوئے اسٹریٹ کرائمز پر نوٹس لیتے ہوئے تمام ڈی آئی جیز سے متعلقہ اضلاع اور تھانوں کی کارکردگی کی تفصیلات فوری طور پر طلب کر لیں۔ ترجمان سندھ پولیس کے مطابق آئی جی سندھ کا کہنا تھا کہ انسداد جرائم اقدامات میں عدم کارکردگی اور غفلت کے مرتکب ایس ایچ اوز کا اہم ذمہ داریوں پر رہنے کا کوئی جواز نہیں بنتا، انہوں نے تمام سپروائزری افسران سے کہا کہ محکمانہ فرائض میں غفلت، لاپروائی یا کوتاہی ہرگز ناقابل برداشت ہے، اور اس حوالے سے کوئی بھی رپورٹ ان کے خلاف ناصرف محکمانہ، بلکہ قانونی کارروائی کی بھی وجہ بن سکتی ہے۔

آئی جی سندھ نے ہدایات جاری کیں کہ کراچی پولیس رینج میں گزشتہ دو سالوں کے دوران اسٹریٹ کرائمز، ٹارگٹ کلنگ اور دیگر سنگین جرائم میں ملوث، اور بعد ازاں گرفتاری سے متعلقہ عدالتوں سے ضمانتوں پر رہائی پانے والے ملزمان کی فہرستیں جلد سے جلد ترتیب دے کر ارسال کی جائیں۔ آئی جی سندھ نے ہدایات جاری کیں کہ رمضان المبارک ایمرجنسی پلان کے تحت تمام پولیس رینج باہمی روابط اور معلومات کی شیئرنگ نظام کو ٹھوس بناتے ہوئے مجموعی جرائم سمیت مفرور اشتہاری اور مقدمات میں پولیس کو مطلوب ملزمان کے خلاف پولیس ایکشن کو ہر سطح پر مؤثر اور کامیاب بنائیں۔ انہوں نے کہا کہ اس حوالے سے سندھ رینجرز اور دیگر انٹیلی جینس اداروں و ایجنسیوں سے مستحکم رابطوں جیسے اقدامات پر خصوصی توجہ دی جائے۔
خبر کا کوڈ : 547338
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش