اسلام ٹائمز۔ پاکستان علماء کونسل کے چیئرمین حافظ طاہر محمود اشرفی کہتے ہیں کہ سعودی عرب میں دہشتگردی کے واقعات کی جتنی مذمت کی جائے کم ہے، 15 جولائی کو ملک بھر میں یوم تحفظ حرمین الشریفین منایا جائے گا۔ لاہور پریس کلب میں پاکستان علماء کونسل کے چیئرمین حافظ طاہر محمود اشرفی نے سعودی عرب میں حالیہ دہشتگردی کے واقعات کے حوالے سے پریس کانفرنس کی۔ پریس کانفرنس میں صاحبزادہ زاہد ٘محمود قاسمی، مولانا غلام اللہ خان، مولانا سردار احمد خان لغاری، پیر محفوظ مشہدی، مولانا غلام اکبر ساقی، مولانا محمد ایوب صفدر، مولانا عبدالحمید وٹو، مولانا محمد طیب اور مولانا محمد عبداللہ سمیت جماعتوں کے عہدیداروں نے شرکت کی۔ حافظ طاہر محمود اشرفی نے کہا کہ پاکستان کی مختلف مذہبی اور سیاسی جماعتوں کے قائدین حرمین الشریفین کے تحفظ اور سلامتی کیلئے حکومت پاکستان سے سعودی حکومت کیساتھ تعاون کی اپیل کرتے ہیں۔ ان کا کہنا تھا کہ 14 جولائی کو اسلام آباد میں مختلف مذہبی اور سیاسی جماعتوں کا نمائندہ اجلاس بلایا جائے گا تا کہ سعودی عرب کی موجودہ صورتحال کا مقابلہ کرنے کے لیے لائحہ عمل طے کیا جائے۔