بارشوں کے باعث کراچی میں بجلی کا بڑا بحران تشویش ناک بات ہے، ایم کیو ایم

اسلام ٹائمز۔ متحدہ قومی موومنٹ کے رہنما اور سندھ اسمبلی میں اپوزیشن لیڈر خواجہ اظہار الحسن نے کہا ہے کہ بارشوں کے باعث شہر کراچی میں بجلی کا بڑا بحران تشویش ناک بات ہے۔ تفصیلات کے مطابق کراچی میں جمعہ کی شام سے شروع ہونے والے بارش کے سلسلے کے باعث شہر کا بڑا حصہ تاریکی میں ڈوب گیا۔ اس دوران اپوزیشن لیڈر خواجہ اظہار نے کے الیکٹرک کی انتظامیہ سے رابطہ کیا اور صورتحال پر برہمی کا اظہار کیا۔ ان کا کہنا تھا کہ موجودہ بارشوں کی چند بوندوں سے شہر کا تاریکی میں ڈوب جانا باعث شرم ہے۔ خواجہ اظہار نے کہا کہ ہر بارش میں عوام کو کے الیکٹرک کی ناقص کارکردگی کا خمیازہ بھگتنا پڑتا ہے، کے الیکٹرک ہنگامی طور شہر کی بجلی بحال کرے۔ اپوزیشن لیڈر نے کراچی ائرپورٹ پر بھی بجلی کے نہ ہونے کو انتہائی تشویش کی بات قرار دیا۔