جشن آزادی منانے کا مقصد قیام پاکسان کے وقت کیے گئے عہد کی یاد تازہ رکھنا ہے، ڈاکٹر محمد ظہورالحسن ڈوگر

اسلام ٹائمز۔ جشن آزادی کے سلسلے میں یونیورسٹی آف سرگودھا میں خصوصی واک کا اہتمام کیا گیا، جس کی قیادت وائس چانسلر پروفیسر ڈاکٹر محمد ظہورالحسن ڈوگر نے کی۔ اس موقع پر خطاب کرتے ہوئے وائس چانسلر پروفیسر ڈاکٹر محمد ظہورالحسن ڈوگر نے کہا کہ یوم آزادی کا مقصد صرف جشن منانا ہی نہیں، بلکہ یہ دن ہمیں اُس عہد کی یاد تازہ دلاتا ہے، جو ہم نے عظیم قوم بننے کے لئے قیامِ پاکستان کے وقت کیا تھا۔ انہوں نے کہا کہ پاکستان میں معاشرتی ترقی کے ساتھ معاشی ترقی کا عمل شروع ہو چکا ہے اور وہ وقت دور نہیں جب پاکستان ایشیاء کی عظیم پاور بنے گا۔ واک میں ڈائریکٹر ہم نصابی فورم حافظ محمد عالم، رجسٹرار یونیورسٹی مدثر کامران، ڈین فیکلٹی آف ایگری کلچر پروفیسر ڈاکٹر محمد افضل، ڈین فیکلٹی آف آرٹس اینڈ لاء پروفیسر ڈاکٹر نواز محسود، ڈائریکٹر تعلقاتِ عامہ و مطبوعات ڈاکٹر اعجاز رسول نورکا، ریذیڈنٹ آفیسر پروفیسر ڈاکٹر مسعود سرور اعوان، شعبہ جات کے صدور، اساتذہ اور ملازمین کی کثیر تعداد نے شرکت کی۔