اسلام ٹائمز۔ خیبر پختونخوا کے ضلع نوشہرہ سے تین بوری بند لاشیں ملی ہیں، ابتدائی تحقیقات کے بعد پولیس نے دو لاشیں ورثاء کے حوالے جبکہ ایک لاش کو امانتاً دفن کردیا ہے۔ پولیس کے مطابق تینوں لاشیں قتل شدہ تھیں تاہم ان کے جسموں پر تشدد کے اثرات نہیں تھے۔ تینوں افراد کی عمریں 20 سے پچپن سال کے درمیان تھیں۔ لاشوں سے برآمد ہونے شناختی کارڈ کے مطابق عبداللہ اور ارشد للہ کا تعلق صوابی سے جبکہ جواد کا تعلق مردان سے تھا۔ پولیس کا مزید کہنا ہے کہ عبداللہ اور ارشداللہ کی لاشیں ورثا کے حوالے کی گئی ہیں جبکہ جواد کے ورثا کے نہ ملنے پر اس کی لاش کو امانت کے طور پر دفن کیا گیا ہے۔ نوشہرہ ڈسٹرکٹ ہسپتال میں پوسٹ مارٹم کے بعد پولیس نے نامعلوم افراد کے خلاف مقدمہ بھی درج کرلیا ہے۔