اسلام ٹائمز۔ چارسدہ کے علاقے میں پولیس وین پر حملے میں ایک اہلکار شہید جبکہ تین اہلکاروں سمیت چھ افراد زخمی ہوگئے ہیں۔ حملے میں ایک مسافر بس کو بھی شدید نقصان پہنچا۔ پولیس وین کو شب قدر کے علاقے سروکلئی میں نشانہ بنایا گیا۔ ریموٹ کنٹرول بم دھماکے میں ایک اہلکار شہید ہوگیا، واقعہ میں تین پولیس اہلکاروں سمیت چھ افراد شدید زخمی بھی ہوئے، پولیس وین کے قریب سے گزرتی مسافر بس بھی دھماکے کی زد میں آئی۔ دھماکے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے لیا تاہم حملہ آورں کا کوئی سراغ نہیں مل سکا، دھماکے کے زخمیوں کو مقامی ہسپتال منتقل کردیا گیا ہے۔ اطلاعات کے مطابق دہشتگردی کا نشانہ بننے والے اہلکار پولیو ٹیموں کی سکیورٹی پر مامور تھے۔