QR Code

گروپ فائیو پلس ون ایٹمی معاہدے کی پاسداری کرے، ڈاکٹر حسن روحانی

3 Dec 2016 19:51

اسلام ٹائمز: تہران میں مشرق وسطٰی کے امور میں روسی صدر کے خصوصی نمائندے "لاورنتیف" کیساتھ ملاقات میں ایرانی صدر کا کہنا تھا کہ ایٹمی سمجھوتہ، سات ممالک کی کوششوں کا نتیجہ ہے، جو عالمی امن و سلامتی کے دائرے میں انجام پایا ہے، اس لئے اس بات کی اجازت نہ دی جائے کہ ایک ملک اپنی مرضی کے مطابق سمجھوتے کو کمزور کرنے کا کوئی اقدام انجام دے۔

اسلام ٹائمز۔ اسلامی جمہوری ایران کے صدر ڈاکٹر حسن روحانی نے کہا ہے کہ گروپ پانچ جمع ایک میں شامل تمام ممالک کو چاہئے کہ وہ مشترکہ جامع ایکشن پلان کے نتائج کا تحفظ کریں۔ ایرانی صدر نے ہفتے کے روز تہران میں مشرق وسطٰی کے امور میں روسی صدر کے خصوصی نمائندے "لاورنتیف" کے ساتھ ملاقات میں کہا کہ ایٹمی سمجھوتہ، سات ملکوں کی کوششوں کا نتیجہ ہے، جو عالمی امن و سلامتی کے دائرے میں انجام پایا ہے، اس لئے اس بات کی اجازت نہ دی جائے کہ ایک ملک اپنی مرضی کے مطابق سمجھوتے کو کمزور کرنے کا کوئی اقدام انجام دے۔ ڈاکٹر حسن روحانی نے کہا کہ ایران ہمیشہ اپنے بین الاقوامی معاہدوں کا پابند رہا ہے اور رہے گا اور ایٹمی معاہدے کی پائیداری کے لئے، گروپ پانچ جمع  ایک کے ممالک کو بھی چاہئے کہ وہ مکمل طور پر اپنے وعدوں پر عمل کریں۔ ایرانی صدر نے اسی طرح علاقائی استحکام اور دہشت گردی کے خلاف جنگ کے لئے ایران اور روس کے درمیان باہمی تعاون اور ہم فکری جاری رہنے کی ضرورت پر تاکید کرتے ہوئے کہا کہ دو طرفہ مسائل میں دونوں ملکوں کا باہمی تعاون، دونوں قوموں کے فائدے اور علاقے میں امن و استحکام کے قیام میں مددگار ثابت ہوگا۔ مشرق وسطٰی میں روسی صدر ولادیمیر پوتن کے نمائندے لاورنتیف نے بھی اس ملاقات میں اس بات کا ذکر کرتے ہوئے کہ پوتن، ایران اور روس کی قوموں کے درمیان پائے جانے والے اعتماد کے بہت زیادہ قدرداں ہیں، علاقائی اور عالمی مسائل میں تہران اور ماسکو کے باہمی تعاون کی تقویت پر تاکید کی۔ انہوں نے کہا کہ مشترکہ جامع ایکشن پلان کے سلسلے میں ماسکو کا موقف ٹھوس اور مستحکم ہے اور اس کو کمزور کئے جانے کی کوئی وجہ نہیں ہے۔      

خبر کا کوڈ: 588508