0
Thursday 15 Dec 2016 16:46

جنید جمشید کی نماز جنازہ ادا، دارالعلوم کراچی میں سپرد خاک

جنید جمشید کی نماز جنازہ ادا، دارالعلوم کراچی میں سپرد خاک
اسلام ٹائمز۔ طیارہ حادثے میں جاں بحق ہونے والے معروف نعت خواں اور مبلغ جنید جمشید کے جسد خاکی کو معروف دیوبندی درسگاہ دارالعلوم کراچی میں سپرد خاک کر دیا گیا ہے۔ تفصیلات کے مطابق طیارہ حادثے میں جاں بحق ہونے والے معروف نعت خواں اور مبلغ جنید جمشید کی تدفین ان کی خواہش کے مطابق دارالعلوم کراچی کے قبرستان میں کر دی گئی ہے۔ جنید جمشید کی تدفین کے موقع پر ان کے اہل خانہ اور قریبی ساتھیوں سمیت بڑی تعداد میں عوام نے شرکت کی۔ قبل ازیں جنید جمشید کی نماز جنازہ معین خان اکیڈمی سے متصل گراؤنڈ میں ادا کی گئی، جنید جمشید کی نماز جنازہ معروف عالم دین مولانا طارق جمیل نے پڑھائی، جس میں جید علمائے کرام، سابق قومی کرکٹرز اور شوبز ستاروں سمیت اہم سیاسی و سماجی شخصیات نے شرکت کی۔ جنید جمشید کی نماز جنازہ سے قبل مولانا طارق جمیل نے بیان بھی کیا، جس میں انہوں نے دنیا و آخرت کے اہم پہلوؤں پر روشنی ڈالی۔

جنید جمشید کی نماز جنازہ کے موقع پر سیکیورٹی کے بھی انتہائی سخت انتظامات کئے گئے تھے، گراؤنڈ کے اندر اور باہر پولیس اور رینجرز کی بھاری نفری کو تعینات کیا گیا، جبکہ گراؤنڈ کو بم ڈسپوزل اسکواڈ اور سراغ رساں کتوں کی مدد سے بھی سرچ کیا گیا۔ گزشتہ روز جنید جمشید سمیت طیارہ حادثے میں جاں بحق دیگر افراد کی نور خان ایئربیس پر نماز جنازہ ادا کی گئی، جس کے بعد جنید جمشید کی میت سی ون 30 طیارے کے ذریعے فیصل بیس کراچی پہنچائی گئی تھی۔ واضح رہے کہ چند روز قبل چترال سے اسلام آباد جانے والی پی آئی اے کی پرواز ایبٹ آباد میں حویلیاں کے قریب گر کر تباہ ہوگئی، جس سے معروف نعت خواں جنید جمشید، ان کی اہلیہ، ڈپٹی کمشنر چترال، ان کی اہلیہ، بیٹی اور 3 غیر ملکیوں سمیت 47 افراد جاں بحق ہوگئے تھے۔
خبر کا کوڈ : 591967
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش