اسلام ٹائمز۔ پاکستان تحریک انصاف نے دو ہزار اٹھارہ کے عام انتخابات کی تیاری شروع کر دی۔ سیکرٹری جنرل پی ٹی آئی کہتے ہیں جنوری کے آخر تک قومی اسمبلی کے امیدواروں کی پہلی کھیپ کا اعلان ہو جائے گا۔ سیکرٹری جنرل پی ٹی آئی جہانگیر ترین نے لودھراں کے نواحی علاقوں کا دورہ کیا اور کارکنوں سے ملاقات کی۔ اس موقع پر کارکنوں نے پی ٹی آئی کی آئندہ انتخابات کی تیاری سے متعلق سوالات کئے تو جہانگیر ترین نے بتایا کہ تحریک انصاف الیکشن موڈ میں چلی گئی ہے۔ امیدواروں کا فیصلہ کرنے کیلئے پارلیمانی بورڈ تشکیل دے دیا ہے۔ جنوری کے آخر تک قومی اسمبلی کے امیدواروں کی پہلی کھیپ کا اعلان ہو جائے گا۔ انہوں نے کہا کہ عمران خان کے عوامی جلسوں کا شیڈول طے ہوگیا ہے، پہلے مرحلے میں بہاولپور، ڈیرہ غازی خان اور ہنگو میں جلسے کئے جائیں گے۔ ایک سوال کے جواب میں جہانگیر ترین کا کہنا تھا کہ آصف زرداری اور بلاول بھٹو کے پارلیمنٹ آنے سے کوئی خاص فرق نہیں پڑے گا۔