اسلام ٹائمز۔ وفاقی وزیر برائے انسانی حقوق سینیٹر کامران مائیکل نے بین الاقوامی برادری سے مطالبہ کیا ہے کہ وہ مقبوضہ کشمیر میں بھارت کی طرف سے انسانی حقوق کی کھلم کھلا خلاف ورزی اور ظلم روکنے میں کردار ادا کرے۔ ان خیالات کا اظہار انہوں نے اسلام آباد میں یورپی یونین کے سفیر جین فرانسیکوس کی قیادت میں یورپی یونین کے وفد سے ملاقات کے دوران کیا۔ اس موقع پر ڈائریکٹر جنرل حسن منگی اور وزارت انسانی حقوق کے دیگر متعلقہ حکام بھی موجود تھے۔ انھوں نے کہا کہ کشمیر میں جاری ظلم پر عالمی برادری کی خاموشی معنی خیز ہے۔ ملاقات کے دوران باہمی دلچسپی کے امور سمیت خطے میں امن و استحکام اور خاص کر انسانی حقوق کے تحفظ اور فروغ کیلئے مختلف امور زیر بحث آئے۔