ایم کیو ایم پاکستان کا عارضی مرکز پی آئی بی کالونی سے بہادرآباد منتقل کرنیکا فیصلہ

اسلام ٹائمز۔ متحدہ قومی موومنٹ پاکستان کے پی آئی بی کالونی میں واقع عارضی مرکز کو کراچی کے معروف علاقے بہادر آباد میں منتقل کرنے کا فیصلہ کر لیا گیا، اس مقصد کیلئے بہادرآباد میں جگہ اور عمارت کا انتخاب بھی کر لیا گیا ہے۔ تفصیلات کے مطابق 22 اگست 2016ء کو متحدہ قومی موومنٹ کے قائد الطاف حسین کی جانب سے کراچی پریس کلب پر بیٹھے بھوک ہڑتالی کیمپ کے شرکاء سے پاکستان مخالف اور اشتعال انگیز خطاب کے بعد ڈاکٹر فاروق ستار کی قیادت میں ایم کیو ایم کا ایک دھڑا الگ ہوگیا تھا اور اس نے اپنی شناخت متحدہ قومی موومنٹ پاکستان کی حیثیت سے کرائی تھی۔ کراچی آپریشن کے نتیجے میں عزیزآباد میں واقع ایم کیو ایم کے مرکز نائن زیرو کو سربمہر کئے جانے کے باعث ڈاکٹر فاروق ستار نے پی آئی بی کالونی میں اپنی رہائش گاہ کو عارضی مرکز کی حیثیت دے دی تھی اور اس وقت سے اب تک تمام سیاسی سرگرمیوں کا مرکز پی آئی بی کالونی بنا ہوا ہے، جگہ کم پڑنے کے باعث ڈاکٹر فاروق ستار کی رہائش گاہ کے قریبی گھروں میں بھی سیاسی سرگرمیاں جاری رہنے سے ایم کیو ایم پاکستان کو اپنی مزید سرگرمیاں جاری رکھنے میں دشواریوں کا سامنا تھا، جس کے باعث مذکورہ قیادت ایک نئی اور کشادہ جگہ کی تلاش کیلئے کوشاں تھی۔