اسلام ٹائمز۔ خیبر ایجنسی میں شادی کی خوشیاں منانے والے خاندان پر قیامت ٹوٹ پڑی، باراتیوں کی گاڑی کھائی میں گرنے سے 5 افراد جاں بحق اور متعدد زخمی ہوگئے۔ نجی ٹی وی کے مطابق لنڈی کوتل کے علاقے کم شلمان میں باراتیوں کی بس بے قابو ہوکر گہری کھائی میں جا گری، حادثے میں 4 خواتین سمیت 5 باراتی جاں بحق اور 10 زخمی ہوگئے۔ ذرائع کا کہنا ہے کہ حادثے کے بعد ریسکیو ٹیموں اور خاصہ دار فورس کے اہلکاروں نے نعشوں اور زخمیوں کو نکال کر لنڈی کوتل اسپتال منتقل کردیا۔ زخمیوں میں بچے اور خواتین بھی شامل ہیں جن میں بعض کی حالت تشویشناک ہے۔