پارا چنار پھر لہو لہو، امام بارگاہ کے قریب زوردار دھماکہ، خواتین و بچوں سمیت 22 افراد شہید، 55 سے زائد زخمی

اسلام ٹائمز۔ پارا چنار شہر کے مرکز میں واقع کرم بازار کی نور مارکیٹ میں امام بارگاہ کے دروازے کے قریب دھماکے کے نتیجے میں ایک خاتون اور 2 بچوں سمیت 22 افراد شہید جبکہ 55 سے زائد افراد زخمی ہیں، جنہیں ہسپتال منتقل کر دیا گیا ہے، جبکہ زیادہ تر زخمیوں کی حالت تشویشناک بیان کی جا رہی ہے۔  رکن قومی اسمبلی ساجد طوری کے مطابق دھماکے کے نتیجے میں 22 افراد شہید اور کم ازکم 100 سے زائد افراد زخمی ہوئے ہیں، جن میں سے زیادہ تر کی حالت تشویشناک ہے، جبکہ علاقے میں فائرنگ کی آوازیں بھی سنائی دے رہی ہیں۔ ان کا کہنا تھا کہ دھماکہ خیز مواد ایک گاڑی میں رکھا گیا تھا، جو امام بارگاہ کے زنانہ گیٹ کے قریب آ کر رکی اور پھر اس میں دھماکہ ہوگیا، جس کے باعث قریبی عمارتوں، دکانوں اور گاڑیوں کو بھی نقصان پہنچا۔ پاک فوج کے تعلقات عامہ کے ادارے (آئی ایس پی آر) کے مطابق زخمیوں کی ہسپتالوں میں جلد منتقلی کیلئے ہیلی کاپٹر روانہ کر دیئے گئے ہیں، جو دھماکے کی جگہ سے زخمیوں کو نکالنے اور شدید زخمیوں کو دیگر شہروں کے ہسپتالوں میں منتقل کرنے کا کام کریں گے۔ اس کے علاوہ پاک فوج کے دستے بھی موقع پر پہنچ چکے ہیں، جنہوں نے علاقے کا کنٹرول سنبھال لیا ہے۔ عینی شاہدین کے مطابق یہ خودکش دھماکہ تھا، تاہم سرکاری ذرائع سے تاحال تصدیق نہیں ہوسکی۔

دھماکہ عین اس وقت ہوا جب لوگوں کی بڑی تعداد بازار میں مصروف تھی۔ دھماکہ اس قدر شدید تھا کہ اس کی آواز دور دور تک سنائی گئی۔ زخمیوں کو ایجنسی ہیڈ کوارٹر اسپتال پارا چنار منتقل کر دیا گیا ہے، جہاں انہیں طبی امداد فراہم کی جا رہی ہے۔ اسپتال حکام نے اب تک 22 افراد کے جاں بحق ہونے کی تصدیق کر دی ہے، جن میں خواتین اور بچے بھی شامل ہیں۔ اسپتال انتظامیہ کی اپیل پر لوگ جوق در جوق آکر خون کے عطیات جمع کروا رہے ہیں، جبکہ پاک فوج کے ہیلی کاپٹرز بھی طبی امداد کے لئے پاراچنار روانہ ہوگئے ہیں۔ واقعے کے بعد سکیورٹی فورسز اور لیویز نے علاقے کا کنٹرول سنبھال لیا ہے، جائے وقوعہ سے اہم شواہد اکٹھے کر لئے گئے ہیں، اس کے علاوہ علاقے میں سرچ آپریشن بھی جاری ہے۔ عینی شاہدین کا کہنا ہے کہ دھماکہ خیز مواد ایک کار میں رکھا گیا تھا، تاہم پولیٹیکل انتظامیہ اور سکیورٹی فورسز کی جانب سے دھماکے کی نوعیت کی تصدیق نہیں کی گئی۔ وزیراعظم نواز شریف نے پارا چنار دھماکے کی شدید الفاظ میں مذمت اور متاثرہ خاندانوں سے اظہار ہمدردی کیا ہے، وزیراعظم نے مقامی انتظامیہ کو پارا چنار دھماکے کے متاثرین کی ہر ممکن امداد کی ہدایت جاری کی ہیں۔ اپنے بیان میں انہوں نے کہا ہے کہ دہشت گردوں کا نیٹ ورک توڑ دیا گیا ہے، ملک سے دہشت گردی کا ہر قیمت پر خاتمہ کریں گے۔ وفاقی وزیر داخلہ چوہدری نثار علی خان نے بھی پارا چنار دھماکے کی شدید مذمت کرتے ہوئے واقعے کی رپورٹ طلب کرلی ہے۔