علماء شیعہ کانفرنس میں جنوبی پنجاب سے بھرپور شرکت ہوگی، عدیل زیدی

اسلام ٹائمز۔ مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے کہا ہے کہ 16 اپریل کو اسلام آباد میں منعقد ہونے والی علماء شیعہ کانفرنس میں جنوبی پنجاب سے علمائے کرام کی بھرپور شرکت ہوگی۔ ملک بھر سے علمائے کرام کا یہ اجتماع ملت کو ٹھوس لائحہ عمل دے گا۔ ان خیالات کا اظہار انہوں نے ایک وفد کے ہمراہ ضلع لیہ میں مختلف علمائے کرام کیساتھ ملاقاتوں اور 16 اپریل کو منعقد ہونے والی کانفرنس میں شرکت کی دعوت دیتے ہوئے کیا۔ وفد میں ایم ڈبلیو ایم شعبہ قم المقدس کے مسئول مولانا رضوان جعفری، ضلعی رہنماء سید غلام سرور شاہ اور محمد حمزہ شامل تھے۔ وفد نے بزرگ عالم دین اور جامعتہ القائم کے پرنسپل مولانا سید ابوذر نقوی اور مولانا سید عباس نقوی، جامعہ دارالقرآن کے پرنسپل مولانا ضیغم عباس میرانی، جامعتہ الرضا کے پرنسپل مولانا سید حسین، مولانا فاطر حسین، مولانا نیاز حسین گھگری، جامع مسجد مومن آباد کے خطیب مولانا سید قطب شاہ، المرکز تبلیغات اسلامی کے پرنسپل مولانا ذوالفقار حیدری، جامع مسجد ڈبی کربلا کے خطیب مولانا عبدالغفار، جامع مسجد حسینیہ کے خطیب مولانا سید سجاد شاہ سمیت دیگر سے ملاقاتیں کیں اور انہیں علماء شیعہ کانفرنس میں شرکت کی دعوت دی۔ اس موقع پر تمام علمائے کرام نے علامہ راجہ ناصر عباس کی ملت تشیع کیلئے جاری کاوشوں کو سراہتے ہوئے اس کانفرنس کو احسن اقدام قرار دیا اور کانفرنس میں شرکت کی یقین دہانی کرائی۔