داعش نے بھرتی کیلئے نوجوانوں کو ہدف بنایا ہے، میجر جنرل آصف غفور

اسلام ٹائمز۔ پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے کہا ہے کہ داعش نے اپنی حکمت عملی تبدیل کرتے ہوئے تنظیم میں بھرتی کےلئے نوجوان نسل کو ہدف بنانا شروع کر دیا ہے۔ ملک بھر میں جاری آپریشن ردالفساد کے تحت ‘شدت پسندی کو شکست دینے میں نوجوانوں کے کردار‘‘ پر منعقدہ ایک سیمینار سے خطاب کرتے ہوئے ڈی جی آئی ایس پی آر کا کہنا تھا کہ نوجوانوں کو دہشت گردی سے بچانا ہماری مشترکہ ذمہ داری ہے۔ میجر جنرل آصف غفور کا کہنا تھا کہ آپریشن رد الفساد کا مقصد ملک میں کیے گئے تمام آپریشنز کے مقاصد کا حصول اور ملک میں امن و استحکام قائم کرنا ہے۔ اس آپریشن کا ایک مقصد معاشرے سے شدت پسندی کا خاتمہ بھی ہے۔ اس مقصد کا حصول اس لیے بھی ضروری ہو گیا ہے کیونکہ ہم دیکھ رہے ہیں کہ اب داعش اپنی حکمت عملی تبدیل کرتے یوئے نوجوان نسل کے ذہنوں کو نشانہ بنا رہی ہے۔ انھوں نے کہا کہ ‘ریاست’ کی حیثیت سے یہ ہماری مشترکہ اور انفرادی ذمہ داری ہے کہ ہم اپنے نوجوانوں کو اس خطرے سے بچائیں، اس عمل کے دوران خطرے کی نشاندہی اور اس حوالے سے جوابی اقدامات اٹھانا شامل ہیں۔ ترجمان آئی ایس پی آر کا کہنا تھا کہ دیگر لوگوں کے ساتھ ساتھ ہماری کامیابیاں نوجوانوں کی ہی مرہون منت ہیں،۔ وردی میں ملبوس پاکستانیوں کی جانب سے دی گئی قربانیوں میں سے 90 فیصد نوجوان سپاہیوں اور افسران کی ہیں۔ انھوں نے حاضرین کو مخاطب کرتے ہوئے کہا کہ آئیں ہم دائمی کامیابی کے لیے ان عظیم قربانیوں کو رائیگاں نہ جانے دیں۔