اسلام ٹائمز۔ وزیر اطلاعات سندھ ناصر حسین شاہ نے کہا ہے کہ بجٹ ن لیگ کے تابوت میں آخری کیل ہے جو اسحاق ڈار نے ٹھوکی ہے، یہ بجٹ نواز لیگ نے اپنے کاروبار کو فائدہ دینے کیلئے پیش کیا ہے۔ تفصیلات کے مطابق ناصر حسین شاہ کا وفاقی بجٹ پر ردعمل کا اظہار کرتے ہوئے کہنا تھا کہ یہ بجٹ نہیں بلکہ غریبوں کے لئے مولا جٹ تیار کیا گیا ہے، اسحاق ڈار کا ودہولڈنگ ٹیکس بھتہ اور مہنگائی کا سونامی لائے گا، وفاق کو نہ تاجر کی فکر ہے نہ کسان کی لیکن پیپلز پارٹی تاجروں اور کسانوں کے ساتھ کھڑی ہے۔ انہوں نے کہا کہ ودہولڈنگ آنے والے وقت کا سب سے بڑا اسکینڈل ہوگا، پاکستان اسٹیل کے بعد تعمیرات کے شعبے کو بھی برباد کیا جارہا ہے، یہی نہیں بجٹ میں تعلیم اور صحت کا شعبہ نظر انداز کیا گیا ہے۔