پاراچنار دھرنے کی وجہ سے دشمن کے ایوانوں میں زلزلہ آگیا ہے، علامہ عابد الحسینی

اسلام ٹائمز۔ تحریک حسینی پاراچنار کے سپریم لیڈر اور سابق سینیٹر علامہ سید عابد حسین الحسینی نے کہا ہے کہ پاراچنار دھرنے کی وجہ سے دشمن کے ایوانوں میں زلزلہ آگیا ہے، دھرنے کے مخالفین اپنی حرکتوں سے باز آجائیں۔ پاراچنار میں جاری احتجاجی دھرنے سے پشتو زبان میں خطاب کرتے ہوئے ان کا کہنا تھا کہ پاراچنار کے عوام مظلوم ہیں، اس پرامن دھرنے نے کسی کو نقصان نہیں پہنچایا، دھرنے نے ہماری مظلومیت کو شعور اور بیداری میں بدلا ہے، اس دھرنے نے دشمن کے ایوانوں میں ایک زلزلہ پیدا کر دیا ہے، جو اس دھرنے کی مخالفت کر رہے ہیں، میں انہیں پیغام دینا چاہتا ہوں کہ باز آجاو، دھرنے کی مخالفت نہ کرو، ظالموں کیخلاف ڈٹ جانے کا درس ہم نے کربلا سے لیا ہے، ہم نہ کربلا کو بھول سکتے ہیں اور نہ ہی ظالموں کے تعاقب کو۔ انہوں نے مزید کہا کہ علامہ راجہ ناصر عباس جعفری پورے پاکستان میں جہاں کہیں بھی شیعیان پاکستان پر ظلم ہوتا ہے، وہ وہاں حاضر ہوتے ہیں، خدا ان کی توفیقات میں مزید اضافہ کرے، تاکہ یہ ملت کی آواز کو مزید بلند کرسکیں۔ انہوں نے کہا کہ جو ظلم کرے اور ظلم پر خاموش رہے اور یا ظالم کا ساتھ دے خدا اس پر لعنت کرتا ہے۔