اسلام ٹائمز۔ پشاور میں ڈینگی سے متاثرہ افراد کی تعداد 500 سے تجاوز کرگئی، اُن میں بیشتر مریضوں کا تعلق تہکال سے ہے۔ میڈیا رپورٹ کے مطابق علاقہ مکینوں کا شکوہ ہے کہ ضلعی انتظامیہ ڈینگی کے تدارک کیلئے مناسب اقدامات نہیں کر رہی ہے۔ مریضوں کو ہسپتالوں میں علاج فراہم کرنے کے بجائے گھروں کو واپس بھیجا جا رہا ہے۔ لوگوں نے بتایا کہ پشاور کا علاقہ تہکال ان دنوں ڈینگی مچھر کی لپیٹ میں ہے۔ تہکال کے رہائشی بختیار احمد کے گھر کا منظر کسی ہسپتال کے وارڈ سے کم نہیں، جہاں قطار میں بچھی چارپائیوں میں ڈینگی سے متاثرہ 11 افراد علاج نہ ہونے کے باعث بے بسی کی تصویر بنے ہوئے دکھائی دیئے۔ بختیار احمد کا کہنا ہے کہ وہ ہسپتالوں کے چکر لگا لگا کر تھک چکا ہے، لیکن ہسپتال میں داخل نہیں کیا جا رہا۔