اسلام ٹائمز - آج ہمیں غلامی سے نجات حاصل کرنی ہوگی اور قائد کا خواب پورا کرنا ہوگا، پرویز خٹک

آج ہمیں غلامی سے نجات حاصل کرنی ہوگی اور قائد کا خواب پورا کرنا ہوگا، پرویز خٹک

سول سیکرٹریٹ پشاور میں جشن آزادی کی تقریب منعقد ہوئی، جس میں پرچم کشائی کی گئی، بچوں نے قومی ترانہ گایا اور کیک کاٹا گیا، جبکہ ایک منٹ کی خاموشی بھی اختیار کی گئی۔

اسلام ٹائمز۔ پشاور سمیت خیبر پختونخوا بھر میں 70ویں یوم آزادی ملی جوش و جذبہ کے ساتھ منائی جا رہی ہے۔ پرچم کشائی کی مرکزی تقریب سول سیکرٹریٹ میں منعقد ہوئی، جس میں وزیراعلٰی خیبر پختونخوا پرویز خٹک مہمان خصوصی تھے۔ تقریب میں وزراء، ارکان اسمبلی، ناظم اعلٰی چیف سکرٹری، آئی جی صلاح الدین محسود اور دیگر اعلٰی حکام شریک ہوئے۔ اس موقع پر بچوں نے قومی ترانہ گایا اور کیک کاٹا، جبکہ ایک منٹ کی خاموشی بھی اختیار کی گئی۔ اس موقع پر وزیراعلٰی پرویز خٹک کا کہنا تھا کہ 70 سالوں میں دنیا کہاں سے کہاں پہنچ گئی، لیکن ہم آج بھی وہیں پر کھڑے ہیں۔ علامہ اقبال نے پاکستان کا خواب دیکھا اور قائداعظم نے اس کو پورا کیا، آج ہمیں غلامی سے نجات حاصل کرنی ہوگی اور قائد کا خواب پورا کرنا ہوگا۔ وزیراعلٰی پرویز خٹک نے کہا کہ ہماری حکومت نے صوبے کے لئے بہت ترقیاتی کام کئے، صوبے کو ترقی کی جانب گامزن کرنے کے لئے کام جاری ہے، بہت قربانیاں دیکر پاکستان بنایا مگر وہ ترقی نہیں کی جو ہونی چاہیئے۔ پاکستان کے تمام بڑے اور چھوٹے شہروں میں سرکاری عمارتوں کو سبز ہلالی پرچموں اور برقی قمقموں سے سجایا گیا ہے، جبکہ رات 12 بجے مختلف شہروں میں عوام کی بڑی تعداد سڑکوں پر نکل آئی اور ایک دوسرے کو جشن آزادی کی مبارکباد دینے کے ساتھ قومی نغموں پر جھوم کر خوشی کا اظہار کیا۔