QR Code

ایم کیو ایم پاکستان نے بلدیاتی نظام سے علیحدہ ہونے کی دھمکی دیدی

11 Sep 2017 15:46

عارضی مرکزی دفتر بہادر آباد میں اجلاس سے خطاب کرتے ہوئے ایم کیو ایم پاکستان کے سربراہ نے بلدیاتی نمائندوں پر بھی سخت برہمی کا اظہار کرتے ہوئے کہا کہ کراچی والوں کو ریلیف نہیں مل رہا، میئر، ڈپٹی میئر یا چیئرمین جس کی بھی کارکردگی بہتر نہیں ہوگی وہ عہدے پر نہیں رہے گا۔

اسلام ٹائمز۔ متحدہ قومی موومنٹ پاکستان کے سربراہ فاروق ستار نے کہا ہے کہ اگر سندھ حکومت نے ہمارے ساتھ تعاون نہ کیا تو بلدیاتی اداروں سے استعفیٰ دے سکتے ہیں۔ تفصیلات کے مطابق ایم کیو ایم پاکستان کے بہادر آباد میں قائم عارضی مرکزی دفتر میں اہم اجلاس ہوا۔ اجلاس سے خطاب کرتے ہوئے فاروق ستار نے سندھ حکومت کو تنبیہ کی کہ اگر ان کے ساتھ تعاون نہ کیا گیا تو تمام بلدیاتی اداروں سے مستعفی ہو سکتے ہیں۔ انہوں نے کہا کہ اگر حکومت نے بلدیاتی اداروں پر کرپٹ افسر مسلط کئے اور نمائندوں کو کاموں سے روکا تو اپنے مستقبل کا فیصلہ کریں گے، سندھ حکومت نے روش نہ بدلی تو سارے بلدیاتی نمائندوں سے استعفیٰ لیا جا سکتا ہے۔ فاروق ستار نے بلدیاتی نمائندوں پر بھی سخت برہمی کا اظہار کرتے ہوئے کہا کہ کراچی والوں کو ریلیف نہیں مل رہا، میئر، ڈپٹی میئر یا چیئرمین جس کی بھی کارکردگی بہتر نہیں ہوگی وہ عہدے پر نہیں رہے گا۔ انہوں نے بلدیاتی نمائندوں کو ہدایت کی کہ کراچی میں کچرا اٹھانے اور سیوریج نظام بہتر بنانے کے لئے کیلیے جنگی بنیادوں پر کام کیا جائے۔

خبر کا کوڈ: 668203