اسلام ٹائمز۔ امریکہ کے سابق وزیر خارجہ جان کیری نے ایرانی جوہری معاہدے کے حوالے سے صدر ڈونلڈ ٹرمپ کے موقف کی مذمت کرتے ہوئے کہا ہے کہ وہ ایک بین الاقوامی بحران پیدا کرنا چاہتے ہیں۔ جرمن خبر رساں ادارے کے مطابق انہوں نے ڈونلڈ ٹرمپ کی جانب سے جوہری معاہدے کی توثیق نہ کرنے کو ایک خطرناک قدم قرار دیا ہے۔ کیری کا کہنا ہے کہ اس فیصلے سے امریکی قومی سلامتی کے مفادات کو خطرات لاحق ہوسکتے ہیں اور ایسی ہی صورت حال کا سامنا قریبی اتحادیوں کو بھی ہوسکتا ہے۔ سابق امریکی وزیر خارجہ نے اراکین کانگریس سے کہا ہے کہ وہ ٹرمپ کے فیصلے کے خلاف کھڑے ہو جائیں۔ یہ امر اہم ہے کہ ایرانی جوہری معائدہ طے کرنے میں سابق امریکی وزیر خارجہ جان کیری بھی طویل مذاکراتی عمل میں شریک تھے۔