اسلام ٹائمز۔ لاہور میں چہلم حضرت امام حسین علیہ السلام کی تیاریوں کا سلسلہ شروع ہو گیا ہے۔ اس حوالے سے محکمہ داخلہ پنجاب نے چہلم کے مرکزی جلوس کیلئے سکیورٹی گائیڈ لائنز جاری کر دی ہیں۔ محکمہ داخلہ پنجاب نے آئی جی پولیس آفس سے چہلم کے موقع پر فوج اور رینجرز طلب کرنے کے حوالے سے سفارشات طلب کی ہیں۔ محکمہ داخلہ کی جانب سے آئی جی آفس سے پوچھا گیا ہے کہ آیا چہلم کے موقع پر موبائل فون سروس اور ڈبل سواری پر پابندی کےحوالے سے ان کی کیا رائے ہے، جلد آگاہ کیا جائے۔ آئی جی آفس سے سفارشات ملنے کے بعد محکمہ داخلہ فوج یا رینجرز طلب کرنے کا حتمی فیصلہ کرے گا۔ اس حوالے سے سپیشل برانچ سے بھی تفصیلات طلب کی گئی ہیں۔ محکمہ داخلہ نے لاہور میں ہونیوالے پاک سری لنکا میچ کے حوالے سے بھی سکیورٹی گائیڈ لائنز جاری کی ہیں۔