اسلام ٹائمز۔ خیبر پختونخوا کے ضلع مردان کی انتظامیہ نے کیمیکل ملا دودھ فروخت کرنے پر 10 دکانوں کو سیل کرکے ہزاروں لیٹر دودھ ضائع کردیا ہے۔ اسسٹنٹ کمشنر مردان محمد عمران خان نے ڈائریکٹر لائیوسٹاک ڈاکٹر حبیب کے ہمراہ مختلف مقامات پر موبائل ٹیسٹنگ لیبارٹری کے ذریعے 22 دکانوں سے دودھ کے نمونے حاصل کئے جس کے دوران 10 دکانوں میں ملاوٹی دودھ کے فروخت کی تصدیق کے بعد انہیں سیل کردیا گیا۔ مقامی افراد نے ضلعی انتظامیہ کی کارروائی کا خیرمقدم کیا۔ اس موقع پر اسسٹنٹ کمشنر محمد عمران خان کا کہنا تھا کہ عوام کی صحت پر کوئی سمجھوتہ نہیں کیا جائے گا، مضر صحت اشیاء کی فروخت کرنے والوں کے خلاف کارروائیاں جاری رہیں گی۔