اسلام ٹائمز۔ قائمقام ضلع ناظم مردان اسد علی نے وکلاء اور ناظم کونسلر اتحاد کے مابین پرانے جیل کی جگہ پر فیملی پارک تنازعے کے حل کیلئے اعلٰی سطحی اجلاس بلانے کا اعلان کیا ہے۔ اپنے ایک بیان میں قائمقام ضلع ناظم اسد علی نے کہا ہے کہ فیملی پارک پر وکلاء اور سول سوسائٹی کے اراکین کے مابین تنازعہ چلا آرہا ہے، جس سے امن و امان کی صورتحال خراب ہونے کا خدشہ ہے اور بہت جلد اس حوالے سے تمام سٹیک ہولڈرز پر مشتمل ایک کانفرنس بلائی جائی گی جس میں وکلاء، تاجروں، ضلع، تحصیل، ویلیج اور نیبر ہوڈ کونسلوں کے اراکین کو شرکت کی دعوت دی جائے گی۔ پرانے جیل کی جگہ پر فیملی پارک یا جوڈیشل کمپلیکس کے حوالے سے لائحہ عمل ترتیب دیا جائے گا۔ انہوں نے کہا کہ پرانے جیل کی جگہ پر جوڈیشل کمپلیکس یا فیملی پارک بنانے پر تمام سیاسی قائدین کو اعتماد میں لیا جائے گا اور کانفرنس میں جو بھی فیصلہ ہوگا اس پر ہر صورت عمل درآمد یقینی بنایا جائے گا۔