اسلام ٹائمز۔ امریکہ اقوام متحدہ میں اپنے خلاف ووٹنگ پر برہم ہوگیا۔ امریکی مندوب نکی ہیلی کہتی ہیں مقبوضہ بیت المقدس میں سفارتخانہ ضرور بنائیں گے۔ اپنے خلاف ووٹ دینے والے ممالک اور اس دن کو یاد رکھا جائے گا۔ رسی جل گئی مگر بل نہیں گیا، دنیا کے سب سے بڑے فورم میں ناکامی پر امریکہ سیخ پا، اقوام متحدہ کی جنرل اسمبلی میں امریکی مندوب نکی ہیلی نے خطاب کرتے ہوئے قرارداد کو امریکی خود مختاری کے خلاف قرار دے دیا۔ ان کا کہنا تھا کہ قرارداد پاس ہونے سے کوئی فرق نہیں پڑتا، مقبوضہ بیت المقدس میں سفارتخانہ ضرور بنائیں گے۔ انہوں نے کہا ان ممالک کو یاد رکھیں گے، جنہوں نے ہمیں بے عزت کیا۔ امریکی صدر ڈونلڈ ٹرمپ پہلے ہی قرارداد پاس ہونے کی صورت میں اقوام متحدہ کے لئے فنڈز کم کرنے کی دھمکی دے چکے ہیں۔