QR Code

سی پیک منصوبہ علاقائی تجارت اور کئی ملکوں کو منسلک کرنے کا باعث بنے گا، شاہد خاقان عباسی

24 Jan 2018 21:44

ڈیوس میں 48ویں عالمی اقتصادی فورم پر پینل مباحثے میں اظہار خیال کرتے ہوئے وزیراعظم کا کہنا تھا کہ سی پیک منصوبے سے نہ صرف پاکستان بلکہ دنیا کے کئی ممالک مستفید ہوں گے۔ پاکستان چینی صدر شی جن پنگ کے اس شاندار اقدام کو تحسین کی نظر سے دیکھتا ہے جنہوں نے اپنے وژن کے ذریعے مستقبل کے لئے عالمی رابطہ تشکیل دیا ہے۔

اسلام ٹائمز۔ وزیراعظم شاہد خاقان عباسی نے کہا ہے کہ مشترکہ خوشحالی کے مقصد کا حامل ”ایک خطہ ایک سڑک“ منصوبہ کئی ممالک، خطوں اور تہذیبوں کو باہم منسلک کرتے ہوئے اقتصادی ترقی میں معاون ثابت ہو گا، سی پیک منصوبے کے تحت پاکستان میں مواصلات، بنیادی ڈھانچے، توانائی کے بڑے منصوبوں پرکام ہو رہا ہے، منصوبے سے علاقائی تجارت کو فروغ ملے گا اور خطے کے عوام ایک دوسرے کے قریب تر آئیں گے۔ ڈیوس میں 48ویں عالمی اقتصادی فورم میں ”ایک خطہ، ایک سڑک کے اثرات” کے موضوع پر پینل مباحثے میں اظہار خیال کرتے ہوئے وزیراعظم شاہد خاقان عباسی کا کہنا تھا کہ سی پیک منصوبے سے نہ صرف پاکستان بلکہ دنیا کے کئی ممالک مستفید ہوں گے۔ پاکستان چینی صدر شی جن پنگ کے اس شاندار اقدام کو تحسین کی نظر سے دیکھتا ہے جنہوں نے اپنے وژن کے ذریعے مستقبل کے لئے عالمی رابطہ تشکیل دیا ہے۔ چین کا تاریخی اقدام کئی براعظموں پر دور رس اثرات کا حامل ہے۔

پینل کے دیگر مقررین میں ایشین انفراسٹرکچر انویسٹمنٹ بینک کے صدر جن لی چن، منیجنگ ڈائریکٹر سائی چن گلوبل لی چن، چیف ایگزیکٹو آفیسر رشین ڈائریکٹ انویسٹمنٹ فنڈ کیرل دمتری آف، چائنہ نیشنل مشنیری انڈسٹریل کارپوریشن کے چیئرمین رین ہانگ بن، سنگا پورکے وزیر چان چن سنگ اور چئیرمین اے ای سی او ایم مائیکل ایس برک شامل تھے۔ واضح رہے کہ وزیر اعظم شاہد خاقان عباسی جو عالمی اقتصادی فورم کے صدر پروفیسر کلاس شواب کی دعوت پر فورم کے اجلاس میں شرکت کے لئے دو روزہ دورے پر ہیں۔

خبر کا کوڈ: 699495