بلوچستان کے کرپٹ عناصر کیساتھ نیب کا پلی بارگیننگ کرنا قوم کیساتھ مذاق ہے، عبدالقدوس ساسولی

اسلام ٹائمز۔ جمعیت علماء پاکستان (نورانی) بلوچستان کے صدر اور ملی یکجہتی کونسل بلوچستان کے جنرل سیکرٹری عبدالقدوس ساسولی نے کہا ہے کہ بلوچستان میں قومی احتساب بیورو کی کارکردگی قابل ستائش نہیں۔ صوبائی سیکرٹریٹ سے جاری بیان میں جے یو پی کے رہنماء نے کہا ہے کہ بڑے بڑے مجرموں کے ذاتی پرتعیش گھروں کو سب جیل قرار دینا اور اربوں کی کرپشن کرنے والوں سے پلی بار گیننگ کرنا قوم کے ساتھ مذاق ہے، جبکہ کرپشن کو مزید فروغ دینے کا باعث ہے۔ بلوچستان کی تاریخ کے سب سے بڑے کرپشن اسکینڈل کے مجرموں کو نیب چند کروڑ کے بدلے ایک ایک کرکے رہا کر رہا ہے، جسکی جتنی مذمت کی جائے کم ہے۔ ہم اس پر ہرگز خاموش تماشائی نہیں بنیں گے۔ جے یو پی کے رہنماؤں نے سپریم کورٹ سے اپیل کی کہ وہ نیب کو قومی مجرموں کے ساتھ پلی بار گیننگ کے عمل سے روکے اور پلی بار گیننگ پر پابندی عائد کی جائے۔