اسلام ٹائمز۔ مسلم لیگ (ن) کی وفاقی حکومت نے کراچی میں طویل لوڈشیڈنگ کا ذمہ دار سندھ حکومت کو قرار دے دیا۔ تفصیلات کے مطابق وفاقی وزیر توانائی اویس لغاری نے وزیراعلیٰ سندھ سید مراد علی شاہ کو دوسرے جوابی خط میں مؤقف اختیار کیا ہے کہ کراچی واٹر بورڈ کو واجب الادا رقم کی ذمہ داری حکومت سندھ پر ہے، صوبائی حکومت واجبات کی ادائیگیوں کا مسئلہ حل کرے۔ خط میں کہا گیا ہے کہ واٹر بورڈ صوبائی حکومت کا ادارہ ہے اور اداروں کے واجبات صوبائی حکومت کی ذمہ داری ہے۔ اویس لغاری نے یہ بھی واضح کیا کہ نیپرا وفاق کا نہیں، قومی ادارہ ہے، جس میں سندھ کی نمائندگی بھی شامل ہے۔ خط میں کراچی والوں کو 660 میگاواٹ بجلی کی فراہمی جاری رکھنے کے عزم کا اظہار بھی کیا گیا۔