چند دنوں سے یو این ڈی پی کا ڈرامہ چل رہا ہے، یہ رپورٹ 2005ء سے 2013ء تک کی تھی، پرویز خٹک

اسلام ٹائمز۔ وزیراعلٰی خیبر پختونخوا پرویز خٹک کا کہنا ہے کہ ترقی سے متعلق یو این ڈی پی کی رپورٹ 2005ء سے 2013ء تک کی تھی۔ گذشتہ روز اقوام متحدہ کے ترقیاتی پروگرام نے پاکستان نیشنل ہیومن ڈویلپمنٹ 2017ء رپورٹ جاری کی، جس میں بتایا گیا کہ ترقی کے اعتبار سے خیبر پختونخوا جنوبی پنجاب سے بھی پیچھے ہے۔ صوابی میں تقریب سے خطاب کرتے ہوئے وزیراعلٰی پرویز خٹک نے اقوام متحدہ کی رپورٹ پر رد عمل کا اظہار کرتے ہوئے کہا کہ چند دنوں سے یو این ڈی پی کا ڈرامہ چل رہا ہے، یو این ڈی پی کی رپورٹ کل دیکھی، پہلے اس رپورٹ کو پڑھ لیا جائے، یہ رپورٹ 2005ء سے 2013ء تک کی تھی۔ وزیراعلٰی کا کہنا تھا کہ ہماری حکومت کے بعد بہت سی رپورٹیں آئیں جن میں ہم ٹاپ پر تھے، اگر ہماری غلطیاں اُچھالتے ہو تو بھلائیاں بھی اُٹھاؤ۔ انہوں نے کہا کہ جو خود چور، ڈاکو اور کرپٹ ہوتے ہیں وہ دوسرے کو بھی وہی سمجھتے ہیں، مخالفین کہتے ہیں کہ پی ٹی آئی نے کیا کیا ہے، الیکشن میں پتہ چل جائے گا کہ تحریک انصاف نے کیا کیا ہے۔