جامعہ عبدالولی خان کے 274 برطرف ملازمین کا احتجاجی دھرنا جاری

اسلام ٹائمز۔ جامعہ عبدالولی خان کے برطرف کئے گئے 274 ملازمین نے ملازمت ختم ہونے کے خلاف احتجاجی دھرنا شروع کر دیا۔ جامعہ کے وائس چانسلر کے دفتر کے سامنے جاری دھرنے میں مرد ملازمین کے ساتھ ساتھ خواتین بھی شامل ہیں۔ دھرنا کے شرکاء نے ہاتھوں میں پلے کارڈز اٹھا رکھے ہیں جن پر یونیورسٹی انتظامیہ کے خلاف نعرے درج ہیں۔ مظاہرین کا کہنا ہے کہ انہیں قانون کے مطابق بھرتی کیا گیا تھا اور 2 سالوں سے وہ اپنے فرائض سرانجام دے رہے ہیں، جبکہ سابق وائس چانسلر نے ان کی مستقلی کے احکامات جاری کئے تھے۔ گورنر خیبر پختونخوا سے فیصلہ کالعدم قرار دینے کا مطالبہ کرتے ہوئے مظاہرین نے دھمکی دی کہ مطالبہ پورا نہ ہونے پر گورنر ہاؤس کا گھیراؤ کریں گے۔ واضح رہے کہ پشاور ہائیکورٹ کے فیصلے کی روشنی میں کی گئی انکوائری کی رپورٹ آنے پر گذشتہ روز سینڈیکیٹ اجلاس میں غیر قانونی طریقے سے بھرتی کئے گئے 274 ملازمین کو فارغ کر دیا گیا تھا۔