پیٹرول زندگی کی بنیادی ضرورت بن چکا ہے، اس پر ٹیکس لگانا غیر منصفانہ ہے، سپریم کورٹ

عدالت میں جمع کرائی گئی دستاویزات میں بتایا گیا کہ عوام صرف جولائی میں 70ارب روپے سے زائد کا اضافی بوجھ بردداشت کریں گے۔ دستاویزات میں بتایا گیا کہ پییڑول پر 37 روپے 63 پیسے فی لیٹر ٹیکسز، ڈیوٹیز وصول کئے جا رہے ہیں، ہائی اسپیڈ ڈیزل پر 52روپے 24 پیسے فی لیٹر ٹیکسز، ڈیوٹیز وصول کئے جا رہے ہیں۔ عدالت کو بتایا گیا کہ مٹی کے تیل پر 22 روپے 93 پیسے فی لیٹر ٹیکسز، ڈیوٹیز عائد ہیں جبکہ لائٹ ڈیزل پر 17 روپے 19 پیسے فی لیٹر ٹیکسز اور ڈیوٹیز عائد ہیں۔ اس طرح دستاویزات میں یہ بھی بتایا گیا کہ پیٹرول پر 17روپے 46پیسے فی لیٹر جی ایس ٹی وصول کیا جا رہا ہے جبکہ ہائی اسپیڈ ڈیزل پر 28 روپے 23پیسے فی لیٹر جی ایس ٹی وصول کیا جا رہا ہے۔ پی ایس او کی تفصیلات میں بتایا گیا کہ مٹی کے تیل پر 12 روپے 74 پیسے فی لیٹر جی ایس ٹی وصول کیا جا رہا ہے، اسی طرح لائٹ ڈیزل پر 11روپے 76 پیسے فی لیٹر جی ایس ٹی وصول کیا جا رہا ہے۔ دستاویز کے مطابق پیٹرول پر 10 روپے فی لیٹر پٹرولیم لیوی وصول کی جا رہی ہے جبکہ ہائی اسپیڈ ڈیزل پر8 روپے فی لیٹر پٹرولیم لیوی وصول کی جا رہی ہے۔

عدالت میں جمع دستاویز میں بتایا گیا کہ مٹی کے تیل پر 6 روپے فی لیٹر جبکہ لائٹ ڈیزل پر 3 روپے فی لیٹر پٹرولیم لیوی وصول کی جا رہی ہے۔ دستاویز میں بتایا گیا کہ ڈیلرز کمیشن، او ایم سیز مارجن، ان لینڈ فریٹ مارجن بھی الگ سے وصول کیا جا رہا ہے۔ اس موقع پر چیف جسٹس نے ریمارکس دیئے کہ آج تمام اسٹیک ہولڈرز بیٹھیں اور سوچیں نقصان کے بغیر قیمت کتنی کم ہو سکتی ہے، جس پر اٹارنی جنرل نے کہا کہ اتنی جلدی ممکن نہیں کل تک کا وقت دے دیں، سیلز ٹیکس پر اضافہ کیا گیا ہے اس پر ہوم ورک کر لیں گے۔ دوران سماعت جسٹس عمر عطا بندیال نے ریمارکس دیئے کہ اٹارنی جنرل آپ نے دیکھنا ہے کہ یہ نگران حکومت ہے، نگران حکومت پر کوئی سیاسی دباؤ نہیں ہوتا، ہو سکتا ہے محصولات میں کوئی شارٹ فال ہو، جس پر اٹارنی جنرل نے جواب دیا کہ جو بھی ممکن ہوگا وفاقی حکومت سے پوچھ کر بتاؤں گا۔ بعد ازاں عدالت نے اتوار تک ہوم ورک مکمل کرنے کا وقت دیتے ہوئے سماعت 8 جولائی تک ملتوی کردی۔