QR Code

کراچی، بچوں کی گمشدگی اور مبینہ تشدد کے واقعات پر آئی جی سندھ نے رپورٹ طلب کرلی

7 Aug 2018 17:13

ایس ایس پی ملیر منیر شیخ کا کہنا تھا کہ گزشتہ روز 3 بچے غائب ہوئے اور تھوڑی دیر بعد خود ہی واپس آگئے۔ انہوں نے بتایا کہ بچوں کے جسم پر تشدد کے نشانات تھے جبکہ میڈیکل رپورٹ میں بھی بچوں پر تشدد ثابت ہوا۔

اسلام ٹائمز۔ کراچی کے علاقے قائد آباد میں بچوں کی گمشدگی اور ان پر مبینہ تشددکے واقعات پر انسپکٹر جنرل سندھ پولیس امجد جاوید سلیمی نے ڈی آئی جی ایسٹ سے رپورٹ طلب کرلی۔ تفصیلات کے مطابق گزشتہ روز کراچی کے علاقے قائد آباد میں بچوں کی گمشدگی اور نامعلوم افراد کی جانب سے ان پر تشدد کے واقعات رپورٹ کئے گئے۔ اس حوالے سے ایس ایس پی ملیر منیر شیخ کا کہنا تھا کہ گزشتہ روز 3 بچے غائب ہوئے اور تھوڑی دیر بعد خود ہی واپس آگئے۔ انہوں نے بتایا کہ بچوں کے جسم پر تشدد کے نشانات تھے جبکہ میڈیکل رپورٹ میں بھی بچوں پر تشدد ثابت ہوا۔ بچوں پر تشدد کے مبینہ واقعات کے خلاف اہل علاقہ نے آج احتجاج کیا، مظاہرین ڈی ایس پی قائد آباد کے دفتر میں داخل ہوگئے جہاں انہوں نے ملزمان کی گرفتاری کا مطالبہ کیا۔ گمشدگی اور بچوں پر تشدد کے مبینہ واقعات پر آئی جی سندھ امجد جاوید سلیمی نے ڈی آئی جی ایسٹ سے رپورٹ طلب کرلی۔ دوسری جانب پولیس حکام کا کہنا ہے کہ قائدآباد کے علاقے شیرپاؤ کالونی میں سرچ آپریشن کے دوران 23 مشتبہ افراد کو حراست میں لیا گیا ہے۔ پولیس حکام کے مطابق تمام مشتبہ افراد کو تھانے منتقل کردیا گیا، جہاں ان سے بچوں پر تشدد کی تفتیش کی جارہی ہے جبکہ زخمی بچوں کے والدین کی مدعیت میں مقدمات درج کئے جائیں گے۔

خبر کا کوڈ: 743073