اسلام ٹائمز۔ پشاور پولیس نے سینئر ٹریفک وارڈن کو تشدد کا نشانہ بنانے والے شہری کو گرفتار کرلیا۔ ذرائع کے مطابق پشاور میں گاڑی کیلئے راستہ نہ دینے پر پیشے سے خود کو وکیل ظاہر کرنے والے شخص نے سینئر ٹریفک وارڈن کو زور دار دھکا دیا جس سے وہ دور جا گرا، اس کے بعد ملزم نے ٹریفک وارڈن پر لاتوں اور گھونسوں سے حملہ کر دیا جبکہ ملزم نے وارڈن پر گاڑی چڑھانے کی بھی کوشش کی۔ واقعے کی ویڈیو سوشل میڈیا پر وائرل ہوگئی جس کے بعد آئی جی خیبر پختونخوا نے نوٹس لیتے ہوئے سی سی پی او پشاور کو کارروائی کا حکم دیا جس پر پولیس نے ملزم کو گرفتار کرلیا۔